انا (الاء) عندي ٢٨سنه.. كنت عايشه حياه سهله ومريحه من غير مشاكل و الجواز مكانش في دماغي خالص لاني كنت حاسه انه هيقيد حريتي وانا كده مبسوطه بحياتي
وفي يوم وانا ماشيه في الشارع شاب اعترض طريقي وعاكسني وفي لحظه لقيت شاب كان معدي بالصدفه شده من هدومه ونزل فيه ضرب ووقعه علي الارض والناس اتلمت وفضلو يضربو في فيه.. وقال له لو شوفت وشك تاني متسالنيش هعمل ايه..
طبعا الشاب ده عجبني وعجبتني شهامته ورجعت البيت اليوم. ده حكيت لماما عنه
وبقيت بتمني اشوفه تاني ولو صدفه وبقيت امشي من نفس المكان الي شوفته فيه اول مره بس للاسف عدي شهرين ومشوفتوش وبدات انسي الموضوع وانساه هو كمان يعني هو انا اعرفه منين ؟
وفي مره وانا واقفه مستنيه تاكسي بعد مخلصت شغل لقيت واحد بيكلمني بيقول كان نفسي اشوفك تاني ..بصيت لقيته هو بصراحه فرحت وقلبي دق بسرعه وقولت له انا الي كنت عايزه اشكرك علي الي عملته معايا المره الي فاتت..قال لي لا ابدا ده واجب لا شكر علي واجب ولقيت تاكسي شاورت له ومشيت
فات كام يوم علي المقابله دي لقينا الباب بيخبط ماما فتحت لقت بنت بتسال عليا .. جيت لقيت بنت معرفهاش.. قولت لها اهلا وسهلا حضرتك عيزاني؟ قالت ايوه .. انا ليلي )اخت (زياد)) الشاب الي دافع عنك يوم الخناقه لو لسه فكراه. .. قولت اه طبعا فكراه اتفضلي.. ودخلت قعدت وقالت لي انه شافني مره وعجبته ومشي ورايا وسال وعرف كل حاجه عني بس اتكسف يكلمني وقال يدخل البيت من بابه .. وانا جايه النهارده اسمع رايك.. طبعا الكلام ده فرحني جدا..
هو لسه في حد بالاخلاق دي اليومين دول؟.. وقالت لي انه محاسب وعنده شقته في بيت باباه .. قولت لها هفكر وا خد راي بابا وماما ونبلغك الرد وان شاء الله ربنا يقدم الخير .. وبعد ما ليلي مشيت اتكلمت مع ماما وباب وقولت لهم انا قلقانه من الجواز في بيت العيله وان بيحصل مشاكل .. بس ماما وبابا كان رايهم ان شاب بالاخلاق والشهامه دي مستحيل يسمح لحد يضايقني او يعمل معايا مشاكل .. وفعلا ده كان رايي انا كمان.. وكنت فرحانه اوي وكلمت ليلي بلغتها اني موافقه وانهم يجو عندنا الاسبوع الجاي..
وفي المعاد المحدد جه هو وباباه ومامته واخته ومرات اخوه.. مامته وباباه كان شكلهم طيبين جدا وفرحانين بيا كمان..بس مرات اخوه علشان اخوه مسافر بيشتغل بره… كانت عماله تلص لي من فوق لتحت نظرات غريبه ومكانتش مريحاني بس قولت لنفسي انتي مالك بيها اهم حاجه زياد ومامته وباباه و فعلا اتخطبت لزياد
وكان كل يوم بيعدي عليا معاه بيثبت لي ان اختياري كان صح واني محظوظه بيه.. وبعد فتره اتجوزنا ومر علينا اول اسبوع كويس جدا وكنت في قمه السعاده وزياد كمان..لحد اما قررت يوم انزل اقعد مع حماتي شويه واشوفها عايزه ايه .. ومن هنا ابتدت قصه تانيه خالص.. اتفاجئت ب (مروه) مرات اخو جوزي بتنزل …
يتبع …
حكاية الاء
حكاية الاء الجزء الثاني والاخير
(مروه) مرات اخو جوزي بتنزل عند حماتي بلبس ضيق وملفت جدا واستغربت اوي ازاي المحروس جوزها بيسمح لها بكده وازاي حماتي وحمايا ساكتين علي كده.. بصراحه اتضايقت ازاي تلبس اللبس ده قدام جوزي .. وقولت لها ازاي تلبسي اللبس ده وفي رجاله في البيت؟ ضحكت وقالت لى .. رجاله؟ هم فين الرجاله دول؟ لو تقصدي جوزك فانا اكبر منه يعني هو اخويا الصغير .. وندهت لحماتي وقالت لها الحقي شوفي الاء بتقول ايه دي غيرانه علي جوزها مني..لقيت حماتي ضحكت وقالت يابت خليكي فرفوشه متقفشيش كده دي اختهم الكبيره … سكت وقولت خلاص طالما مش قادره علي حماتي وسلفتي اقدر علي جوزي واول مارجع من شغله وطلعنا شقتنا قولت له مينفعش الي مرات اخوك بتعمله ده ومتنزلش تحت طول ماهي لابسه كده.. قال لي يابنتي دي اكبر مني يعني عمرها ما تبص لي وكمان انا استحاله ابص لها دي مرات اخويا .. وبعدين ولا تزعلي نفسك انا هكلمها تلبس واسع طول ماهي تحت عند ماما.. راضيه كده؟ قولت له اه راضيه..
تاني يوم نزلت لقيت مروه لابسه عبايه واسعه .. استغربت جدا .. ده جوزي ملحقش يشوفها او يكلمها .. وقولت لنفسي يمكن كلامي اثر فيها وقررت تلم نفسها …
بعد كام يوم كانت مروه تعبانه وحجزت عند الدكتور وكنت هروح معاها لكن لقيت حماتي بتقول لي لا خليكي انتي معايا بالعيال يا الاء وزياد يروح معاها للدكتور علشان الوقت متاخر ومينفعش تمشو ستات لوحدكم بالليل كده.. طبعا اتضايقت بس متكلكمتش
واتكررت حاجات كده كتير وكانت متعوده تهزر مع زياد هزار اوفر ولما تحس اني اتضايقت تبص لي وتضحك وتقول اوعي تكوني غيرانه ده اخويا الصغير
ولما نكون في شقتنا واكلم زياد انه يخف من هزاره معاها يقول لي انتي غيرتك عليا زياده علشان بتحبيني .. دي اختي الكبيره
.. بصراحه انا مكونتش مرتاحه والشك كان هيموتني يوم بعد يوم
وفي يوم زياد كان في الحمام وموبايله فضل يرن كتير وبعد شويه رسايل ورا بعضها مسكته اشوف مين واتصدمت لما فتحت الرساله .. لقيتها بتقول انت بتوحشني اوي ومراتك الي زي البومه دي بتخليني مش واخده راحتي معاك .. انت جبت لنا مصيبه في البيت.. طبعا انا مقدرتش اتمالك نفسي من العياط لدرجه انه خرج من الحمام علي صوتي وقال لي في ايه؟.. رميت الموبايل في وشه وقولت له انت شيطان بتخونني وتخون اخوك؟ …
. لقيته جاب المصحف وقال والله هي الي غوتني وانا بحبك وخلاص هسيبها وهاخدك ونسكن بره. .. انا كنت ساكته مش لاقيه كلام اقوله .. كنت مصدومه في الادب والشهامه والاخلاق كل ده يطلع كذب؟
وجوزي بقي يعاملني معامله حلوه اوي وهي بتتعامل عادي ولا كان حاجه حصلت تقريبا هو معرفهاش اني عرفت .. انا عملت نفسي سامحته واخدت كل المحادثات الي بينهم سكرين علي موبايلي وفي يوم لقيتهم كلهم متجمعين. تحت عند حماتي وقولت لهم انا مجهزه لكم مفاجاه ووصلت الفون بتاعي علي الشاشه وعرضت لهم المحادثات الي بين جوزي
وبينها لقيت جوزي قام عليا يضربني بالاقلام وحماتي قالت انتي مجنونه عايزه تفرقي بين الاخوات علشان غيرانه من مروه وكلهم قالو عني مجنونه وكذبو الكذبه وصدقوها واتصلو علي بابا جه اخدني .. والمحروس جوزي ابو الشهامه طلقني
طلقني بعد مقال لاهله واهلي اني كذابه وفبركت المحادثات دي علشان غيرانه علي جوزي من مرات اخوه وعايزه افرق بين الاخوات
لقيت نفسي مظلومه ومقهوره وقاعده في بيت اهلي ومطلقه من غير ذنب
قررت انتقم واخد حقي بايدي ..فكرت ااجر لها بلطجيه يضربوها في الشارع ويفرجو عليها الناس.. بس رجعت وقولت لا انا مش هعمل كده انا هفوض امري لله هو المنتقم الجبار
وكنت كل يوم بشوفهم بينزلو صورهم علي الفيسبوك وهم مبسوطين ولا كانهم دمرو حياتي .. وكنت بعيط بحرقه لما اختي جت وقالت لي علي فكره خافي من الي ربنا بيزيده في الضلال لان كده بيكون يوم الانتقام قرب. .. انسيهم وارميهم ورا ضهرك وعيشي حياتك وفي يوم هتلاقي حقك جالك علي طبق من فضه
وفعلا رجعت شغلي تاني الي كنت سبته لما اتجوزت.. ورجعت اخرج مع صحباتي واعيش حياتي زي زمان
وفي يوم لقيت مكالمه من صاحبتي. بتقول لي ربنا خد لك حقك يا الاء .. زياد اتمسك بمخدرات واتسجن واخوه رجع من السفر طلق مراته واخد منها العيال والبيت اتخرب كله .. احمدي ربنا انك خرجتي من العيله دي من غير طفل يربطك بيهم..
انا بصراحه كنت مصدومه في زياد ازاي طلع فيه كل العيوب دي؟
بابا قال لي انتي منتظره ايه من الي يخون اخوه ؟ ممكن تتوقعي منه اي حاجه
فعلا سبحانه وتعالي يمهل ولا يهمل ولازم يرد للمظلوم حقه ولو بعد حين
تمت انتهت القصة
